ບໍລິການຄ້ຳປະກັນການອອກຈຳໜ່າຍຫຼັກຊັບ
ການບໍລິການ:
- ຄ້ຳປະກັນການອອກຈຳໜ່າຍຮຸ້ນໃຫ້ແກ່ ມວນຊົນ ທົ່ວໄປ;
- ຄໍ້າປະກັນການອອກຈໍາໜ່າຍຮຸ້ນໃຫ້ແກ່ ນັກລົງທຶນສະເພາະເຈາະຈົງ;
- ຄ້ຳປະກັນໃນຖານະຜູ້ຄ້ຳປະກັນຫຼັກ ຫຼື ຜູ້ຄ້ຳປະກັນຮ່ວມ;
- ປະສານງານກັບຝ່າຍທີ່ປຶກສາດ້ານການເງິນ ແລະ ປະສານສົມທົບກັບຝ່າຍນາຍໜ້າຊື້-ຂາຍຫຼັກຊັບ ແລະ ຕົວແທນຈຳໜ່າຍເພື່ອສະເໜີຂາຍຫຼັກຊັບທີ່ອອກຈຳໜ່າຍ
BCEL-KT ມີປະສົບການຍາວນານ ແລະ ມີຜົນສຳເລັດສູງໃນການໃຫ້ບໍລິການຄ້ຳປະກັນການອອກຈຳໜ່າຍຫຼັກຊັບ (ລວມທັງ ການອອກຈໍາໜ່າຍຫຼັກຊັບໃຫ້ມວນຊົນຄັ້ງທໍາອິດ-IPO, ການອອກຈໍາໜ່າຍຫຼັກຊັບໃຫ້ມວນຊົນ-PO, ແລະ ການອອກຈໍາໜ່າຍຫຼັກຊັບໃຫ້ຜູ້ຖືຮຸ້ນເດີມ-RO). ບໍລິສັດຍັງມີປະສົບການໃນການໂຄສະນາຂາຍຫຼັກຊັບໃຫ້ກັບນັກລົງທຶນ (ບຸກຄົນ ແລະ ສະຖາບັນ) ທັງຕະຫຼາດພາຍໃນ (ທົ່ວປະເທດ) ແລະ ຕະຫຼາດຕ່າງປະເທດ (ໄທ, ຮົງກົງ, ສິງກະໂປ, ສະຫະລັດອາເມລິກາ ແລະ ອື່ນໆ).
ສໍາລັບຕະຫຼາດພາຍໃນ, BCEL-KT ໄດ້ຮັບການສະໜັບສະໜູນ ຈາກ ບໍລິສັດແມ່ (BCEL) ໃນການເປັນຕົວແທນຈຳໜ່າຍຮຸ້ນ ໃນທົ່ວ ສປປ ລາວ. ສໍາລັບຕະຫຼາດຕ່າງປະເທດ, BCEL-KT ໄດ້ຮັບການສະໜັບສະໜູນຢ່າງເຂັ້ມແຂງ ຈາກບໍລິສັດແມ່ (KT ZMICO) ທີ່ມີປະສົບການ, ຊື່ສຽງ ແລະ ເຄືອຂ່າຍກວ້າງຂວາງໃນຕະຫຼາດຕ່າງປະເທດ.
ຜົນສໍາເລັດການຄ້ຳປະກັນການອອກຈໍາໜ່າຍຮຸ້ນ ຜ່ານມາ ລວມມີ:
- ຄ້ຳປະກັນການສະເໜີຂາຍຮຸ້ນໃຫ້ມວນຊົນຄັ້ງທຳອິດ (IPO) ຂອງ EDL-GEN, ປີ 2010, ມູນຄ່າ ປະມານ 115 ລ້ານໂດລາສະຫະລັດ;
- ຄ້ຳປະກັນການສະເໜີຂາຍຮຸ້ນໃຫ້ມວນຊົນ ຄັ້ງທີ່ສອງ (PO) ຂອງ EDL-GEN, ປີ 2012, ມູນຄ່າ ປະມານ 84 ລ້ານໂດລາສະຫະລັດ;
- ຄ້ຳປະກັນການສະເໜີຂາຍຮຸ້ນໃໝ່ໃຫ້ກັບຜູ້ຖືຮຸ້ນເດີມ (RO) ຂອງ EDL-GEN, ປີ 2012, ມູນຄ່າ ປະມານ 116 ລ້ານໂດລາສະຫະລັດ;
- ຄ້ຳປະກັນການສະເໜີຂາຍຮຸ້ນຄັ້ງທຳອິດ (IPO) ຂອງບໍລິສັດ ລາວເວີນ ມະຫາຊົນ, ປີ 2013, ມູນຄ່າປະມານ 5 ລ້ານໂດລາສະຫະລັດ.